ஊர் திரும்புதல் - 6

வாத்துக்  கூட்டம்

வீட்டின்  மாடியிலிருந்து  அவன் வீட்டுக்கு  எதிரே  இருக்கும்  ஆற்றை பார்த்துக்கொண்டிருந்தான். ஆற்றில்  அவன்  சிறுவனாக  இருந்தபோது அந்த  ஊருக்கு   வந்த  வாத்துக்கூட்டம்  அவன் நினைவுக்கு  வந்தது. 

அவனுடைய  ஊர்  நிலங்களில்  அந்த நாட்களில்  முப்போகம்  விளைந்திருக்கிறது. ஆற்று  நீர்  பாசனத்தில்  நுழைந்த  அரசியலால்  ஒரு  போகம்  காலவட்டத்தில்  குறைத்துவிட்டது. ஒரு  சில விவசாயிகள்  விடாமல்  பம்பு செட்டு  ஓட்டி  முப்போகம்  செய்கின்றனர். அப்போதெல்லாம்  குருவை  முடிந்து  தாளடி நடவுக்கு  தயாராகும்  வேளையில் பொதுவாக  மழைகாலம் தொடங்கும். குருவை  அறுத்தவுடன் தாளடிக்கு விதைவிடுவதற்காக  ஒரு  கட்டத்தை  விட்டுவிட்டால்  நிலத்தின்  மற்றபகுதிகள்  நீர்தேங்கி கண் நிறைத்திருக்கும்.

அதுபோன்ற  நாட்களில்தான்  வடக்கில்  இருந்து  வாத்து  மேய்க்கும்  கூட்டத்தார்  வருவார்கள். அவர்களுக்கென்று  சொந்த ஊர் இருப்பதாக  அவனுக்கு  அப்போதெல்லாம்  தோன்றியதில்லை. அவர்கள்  ஊர் ஊராக  வாத்துகளை  மேய்த்துக்கொண்டு  போய்க்கொண்டே  இருப்பார்கள்.


அவர்களிடம், இறங்கும் ஊரில்  சிறிய  குடிசை  அமைப்பதற்கான  பொருட்களும்,  நைலான்  கயிறுகளுடன்  மரக்குச்சிகளை  சேர்த்து  பின்னிய  வாத்துப்பட்டியும் இருக்கும். அது எளிதில்  சுருட்டி  எடுத்துக்கொண்டு  போகும்  வகையில்  இருக்கும். கூடவே   அவர்களுக்கு  வேண்டிய  சமையல்  சாமான்கள், அடுப்பு, பாத்திரங்கள் எல்லாமும்  இருக்கும். இடப்பெயர்வுகளுக்கு  அது  மிகவும்  முக்கியம்.  இந்த  பொருட்களை எல்லாம்  அவர்கள்  ஒரு  கூண்டு  வண்டியில்  எடுத்துக்கொண்டு  வருவார்கள். ஒவ்வொரு  வாத்துக்கூட்டத்தாரிடமும்  ஒரு காவல்  நாய்  இருக்கும்.  சில நேரங்களில்  அவர்கள்  வட்டவடிவமான  பரிசலும் கூட  எடுத்துவருவார்கள்.

இவர்கள் ஒன்று அல்லது இரண்டு குடும்பங்களாக வருவார்கள். சில நேரங்களில்  சிறிய  குழந்தைகளும்  அவர்களுடன்  இருக்கும்.


அவர்களில்  ஒருவர் ஊர்களை சுற்றிப்பார்த்து அங்கே உள்ள நில உரிமையாளர்களிடமும், தங்குவதற்கும்,  வாத்துப்பட்டி  அமைப்பதற்கும் அனுமதி வாங்கிக்கொண்டு  போவார். பின்னர் ஓரிரு நாட்களில் அந்த  வாத்துக்கூட்டம்  மேற்கூறிய  சாதனங்களுடன்  அந்த  ஊரில்   வந்து இறங்கும். பொதுவாக  குறைத்து  ஒரு  மாதகாலமாவது  ஒரு  ஊரில்  அவர்கள்  இருப்பார்கள்.


அந்த ஊருக்கு வந்த பிறகு, எந்த  நாளில்  எந்தெந்த  வயல்களில் மேய்ச்சல் விடுவது  என்று ஊரில் உள்ள நில  உரிமையாளர்களிடம் கேட்டுக்  கொள்வார்கள்.

அறுவடை செய்த வயல்கள் வாத்துகளுக்கு அருமையான மேய்ச்சல் நிலம். தண்ணீர் நிறைந்த வயல்களில், வாத்துகள் நீந்தி நீந்தி நீருக்குள் மூழ்கி முத்து குளிப்பதுபோல்  இறை தேடும் அழகே ஒரு அழகு. 

அது ஆற்றில் தண்ணீர் பெருக்கெடுத்து ஓடும் நேரமாக இருக்கும். வாத்து மேய்ப்பவர்கள் ஒரு நீண்ட மூங்கில் குச்சியை தனது தோள்களின் மேலே போட்டுகொண்டு தேவைப்படும்போது அந்த குச்சியால் வாத்துகளை வழி நடத்தி   அழைத்து செல்வார்கள்.

வாத்துக்கூட்டங்கள்    நீந்துவதை  தொலைவில்  இருந்து பார்க்கும்போது, அந்த  நீர்பரப்பின்மீது  வண்ணப்போர்வையை போர்த்தியது  போல இருக்கும்.

அப்படித்தான், அன்றொரு நாள், தூங்கி எழுந்த அவன் அந்த  அழகுக்காட்சியை  கண்டான். ஆம், வாத்துக்கள்தான். அவன் வீட்டின் எதிரே உள்ள  அந்த ஆற்றில்   வாத்துக்கள் ஒன்றுடன் ஒன்று ஒட்டிக்கொண்டு   அக்கரையில் இருந்து இக்கரை நீந்திக்கொண்டிருந்தன. அவைகளுடைய  உரத்த குவா குவா ஒலிகள்  ஒரு  குழந்தைகள்  கூட்டம்  கொஞ்சி  கொஞ்சி  ஒட்டி உறவாடி  வருவதுபோல அவனுக்கு  தோன்றியது.  அப்போது அவனுக்கு  10 வயது இருக்கும்,  அவனுக்கு  அந்த  வாத்துக்களுடனேயே ஓடவேண்டும்  என்று  ஆவல்  எழுந்தது. அவனுடைய  பரபரப்பை  பார்த்த  அவனுடைய  தாய்  அவனை  தரதரவென்று  வீட்டுக்குள்  அழைத்துச் சென்றார்கள்.  அவன் மனமெல்லாம்  வெளியில்  ஆற்றில்  நீந்தும்  வாத்துக்கள் மேலேயே   இருந்தது.

    

கூட்டமாக கரையேறிய வாத்துக்கள் குவாக் குவாக் கூச்சல்களுடன்  அவனுடைய  தெரு  வழியாக மேய்ச்சலுக்காக  அந்த  தெருவின்  கடைசியில்  இருந்த  வயல் வெளிகளுக்கு சென்றன. வாத்துக்கள்  சாய்ந்து  சாய்த்து  நடக்கும்  ஒய்யாரத்தை அவன் தன்  கன்னத்தில்  கைவைத்துக்கொண்டு  ரசித்துக்கொண்டிருந்தான். 

மேயும்போது வாத்துக்கள் அங்கும் இங்குமாய் முட்டைகளை இடும். அவைகளை  லாவகமாக எடுக்க வேண்டும். இல்லையெனில் யாரவது  எடுத்துக்கொண்டு  போய்விடுவார்கள். அப்படி எடுக்கும்  சிலர் உரிமையாளரிடம் கொடுத்துபோவதும் உண்டு. அதுவும்  தப்பினால்  முட்டைகள்  யாருக்கும்  தெரியாமல் வீணாக போவதும்  உண்டு.


வயல்களை  அடுத்துள்ள  ஒரு  திடலில்  வாத்துக்களுக்கு  பட்டி  அமைத்திருப்பார்கள். ஒவ்வொரு நாளும்  மாலையில்  மேய்ச்சல்  முடிந்ததும்  பட்டிக்குள் அடைப்பார்கள். பட்டிக்கு  அருகிலேயே  அவர்களுடைய  குடிசை இருக்கும்.   அவர்களின் நாய் இரவு முழுவதும் காவல் காத்துக்கொண்டு இருக்கும்.

வயலில் வாத்துக்கள்  மேய்வதால், நிலத்தின் ஒவ்வொரு அங்குலமும் வாத்துகால்கள் பதித்து  கோலம்  போட்டதுபோல  இருக்கும். வாத்துக்கள் மிதிப்பதால் குருவை  பயிரின்  தாள்கள் மண்ணில்  அழுந்தி  மக்கத்தொடங்கும். வாத்துக்கள்  எச்சம்  நிலத்துக்கு  நல்ல உரம். தாளடி  நடவுக்கு  முன்  மேய்ச்சல்  முடிவுக்கு  வரவேண்டும்.


ஒரு  நிலையான   ஊர்   என்று  இல்லாமல்  எங்கெங்கும்  பயணித்துக்கொண்டே  இருக்கும்  அவர்களுடைய  வாழ்க்கை அவனுக்கு  பிடித்திருந்தது.  அவர்களுடைய   கூட்டங்களை  பார்க்கும்போது  அவர்கள்  எல்லாம் எப்போதும்  மகிழ்ச்சியாகவே  இருப்பதுபோல  அவனுக்கு தோன்றும்.


எல்லாம்   இருக்கும் நாம்தான், "என்ன வாழ்க்கையடா இது",  என்று  அலுத்துக்கொள்கிறோம் என்று எண்ணியவாறு  மாடியில்  இருந்து  இறங்கினான்.



ஊர் திரும்புதல் - 1

ஊர் திரும்புதல் - 2

ஊர் திரும்புதல் - 3

ஊர் திரும்புதல் - 4

ஊர் திரும்புதல் - 5